Kalibo Aklan———Nagapangatubang sa kasong Batas Pambansa numero 6 ukon Illegal Possession of Deadly Weapon ro daywang ka mga indibidwal nga imbolbado sa aksidente nga nag-eontad sa Brgy. Linabuan Norte, Kalibo.
Si Jun Asiong, 29-anyos it Brgy. Loctuga, Libacao ag ro sangka 15-anyos nga binatilyo hay naboe-an it siyaw sa imbestigasyon nga ginpatigayon it mga katapo it Kalibo PNP sa aksidente sa tunga it motorsiklo nga ginamaneho ni Jayboy Asiong, 27-anyos it Brgy. Dalagsaan, Libacao angkas si Abner Asiong, sa legal nga edad ag tapdown tricycle nga ginamaneho ni Jess Luces, 34-anyos it Sitio Pajo, Brgy. Puis, New Washington sakay ro limang katawo nga kaeabanan hay mga menor de edad.
Una kara, sa kurbada nga porsyon it karsada sa nasambit nga lugar hay nasunggaban nanday Asiong ro tapdown ni Luces nga gintuaan it pag-angkon it kasakitan ag lastro sa kaeawasan it daywa sa anang mga sakay bangud sa impact it pagkabangga.
Bangud kara, insigidang gindaea sa provincial hospital ro daywa apang nagpamalibad nga magpaconfine matapos nga maeapatan it nagakaigong medikasyon.
Ro insidente hay nasettle eon it magtimbang nga parte sa Kalibo Police Station.
Samtang, ro nasambit nga binatilyo hay ginrefer sa women’s and children protection desk ukon WCPD ag si Asiong hay temporaryong ginkustudiya sa taeatapan it pulisya para sa nagakaigong disposisyon.
