KALIBO, Aklan—Ninahan ro daywa ka mga eaeaki matapos nga makursunadahan it sangka grupo it kaeaeakin-an sa Brgy. Andagao, Kalibo.
Ro mga tagreklamo hay ginkilaeang sanday Jevy Espinasi, 31-anyos nga nakaangkon it lastro sa ueo, residente it Brgy. Mambuqiao, Batan ag Raffy Santiago, 29-anyos it Brgy. Libang, Makato nga nakaangkon man it lastro matapos nga gin-eapog it bato it mga uwa makilaeang grupo.
Base sa report, samtang naga-inuman kaibahan si Mike Russel, sa legal nga edad sa sangka baraka hay gulpi eamang sigon nga nagpaeapit kanda ro grupo ag dikara may nakaangkon nga komprontasyon sa tunga it daywang ka grupo hasta ko ulihi nga nagpanaw ro mga suspek ag dikara eon natabo ro insidente.
Gintinguhaan pa sigon it mga biktima nga eagson ro mga suspek apang uwa eon nanda ro mga raya naabutan.
Ro insidente hay padayon pang ginaimbestigahan it Kalibo PNP.
