Kalibo Aklan ——Ginkumpirma ni Provincial Health Officer I Dr. Cornelio Cuatchon it PHO-Aklan nga negatibo eon sa 2019 coronavirus disease (COVID-19 ro daywa sa an-om ka mga nagpositibo sa nasambitang sakit sa probinsya.
Raya hay base sa laboratory result nga ginpaguwa ko Abril 20 it Western Visayas Medical Center, Department of Pathology, Sub-National Laboratory.
Suno kay Dr. Cuatchon, negatibo eon sa COVID-19 sa ginpatigayon nga repeat testing ro 81-anyos nga eaeaki halin sa banwa it Libacao ag ro 37-anyos nga frontliner halin sa banwa it Malay.
Samtang ro 68-anyos nga lay minister nga residente it banwa it Kalibo hay nagapabilin nga positibo kamana man ro tatlong iba pa hay nagapabilin nga pending ro resulta.
Sa ginpaguwa nga datos it PHO-Aklan, sa confirmatory testing it Person’s Under Investigation, ro pitong indibidwal nga ginboe-an it specimen sample nga taga-Kalibo hay an-om kara ro nag negatibo ag sambilog pa ro pending.
Samtang ro sa banwa it Banga, ro lima ka mga indibidwal hay puro tanan negatibo sa sakit kamana man sa ginatawag nga unknown exposure hay lima kara ro gintest ag sa nasambitang numero hay sambilog ro nag negatibo ag ap-at pa ro pending.
Sa pihak nga parte, ro datos mat-a sa confirmatory testing to high risk contacts, ro naexpose sa confirmed case Malay hay sambilog ro gintest kara ag negatibo gilayon sa sakit samtang sa Pandan, Antique hay ap-at ro gintest ko sa siin negatibo ro daywa samtang ro daywa hay pending pa ro resulta.
