Kalibo Aklan —– Naugdaw ro daywang ka baeay samtang sambilog ro partially burn matapos ro nag-eontad nga sunog bandang alas-11:01 it agahon sa Brgy. New Buswang, Kalibo.
Suno kay FO1 Eugene Bonite Jr. it Bureau of Fire Protection ukon BFP-Kalibo nga ro totally burn ro abandonadong baeay nga ginapanag-iyahan ni Artilie Ibaste, 73-anyos ag kay Benly Icawalo samtang partially burn ro baeay nga ginapanag-iyahan ni Gloria Dela Cruz.
Ginpahayag dugang ni FO1 Bonite nga base sa andang inisyal nga imbestigasyon, nagsuga sa likod it ana nga abandonang baeay si Ibaste bandang alas-7:00 it agahon kon sa siin ginapabutyag nga ana raya nga ginbasyahan it tubi antes nga gin-aywanan.
Apang bangud sa nakatumpok nga eaya nga dahon ag kahoy hay posible suno kay Bonite nga nagmakot pa raya bangud sa mainit nga panyempo rason nga nagdabdab ag naabot ro anang baeay.
May kaangtanan kara, mabaskog pa sigon ro hangin ag human sa light materials ro nasambitang mga panimaeay kon sa siin ro baga hay inapok sa baeay it Icawalo rason nga nagdabdad raya ag natupok.
Nadaeahig pati ro baeay ni Dela Cruz apang uwa sigon natupok it husto bangud nga naagapan it mga tawo sa lugar nga nagpatigayon it fire brigade kamana man ro mismo nga BFP-Kalibo nga nagresponde sa area.
Ginatantya nga kapin sa 175,000 pesos ro danyos it nasunog nga baeay ag kagamitan it mga biktima.
Samtang, hugot man nga nagpadumdom ro BFP nga likawan ro pagsuga makaron nga mainit ro panyempo ag hugot man raya nga ginabawaean sandig sa ordinansa nga ginapatuman sa banwa it Kalibo.
