KALIBO, Aklan–Padayun pang ginabueong sa sangka ospital sa banwa it Kalibo ro daywang ka mga persona matapos nga maeakot sa aksidente ko adlaw it Sabado sa Sitio Merkulisan, Brgy. Aranas, Balete.
Ro mga biktima hay nakilaea kanday Rene Bartolome, sa legal nga edad; Michael Cual, parehong residente it Brgy. Lalab, Batan ag Kyla Cawaling, residente it Brgy. Aranas sa nasambit nga banwa.
Suno kay Police Corporal Christian Lebuna it Balete Municipal Police Station nga pasado alas-4:05 it hapon ko adlaw it Sabado kat nakabaton sanda it tawag halin sa sangka concerned citizen angot sa natabo nga aksidente.
Sa pagresponde it mga otoridad, nakit-an nanda nga nagahamyangon ag owa it alintro si Bartolome maeapit sa punta it underconstruction nga karsada kung siin may mga naka-usli pa nga kabilya.
Insigida sigon raya nga gintaw-an it paunang medikasyon it mga katapo it Municipal Disaster Risk Reduction and Management Council ag Bureau of Fire Protection antes nga gindaea sa ospital.
Ginapahayag nga halin sa Brgy. Lalab ro mga biktima ag magapaadto kunta sa direksyon it banwang Balete apang pag-abot sa parkubada nga porsyon it nasambit nga lugar hay gulpi eamang nadueaan it kontrol sa ginamaneho nga motorsiklo si Bartolome.
Gindaea man sa ospital si Cual matapos nga makaangkon it pilang injury samtang si Cawaling hay ginbueong sa Rural Health Unit (RHU)-Balete.
Ro insidente hay padayun pang gina-imbestigahan it mga kapulisan.
