KALIBO, Aklan—Nagapadayun ro imbestigasyon it Kalibo Police Station sa pagtumod kon sin-o ro nagapanag-iya it daywang mabahoe nga sachet it ginadudahan nga shabu nga gina-alegar nga napueot sa sangka pampasaherong van nga may biyaheng Roxas-Kalibo vice versa.
Suno kay Police Executive Master Sargent Abraham Regatalio, imbestigador it Kalibo PNP, ro shabu nga nakasueod sa selyadong plastic sachet hay nakaputos sa papel nga ginturn-over it dispatcher nga si Benjie Dela Cruz, 39-anyos ag residente it Barangay Mobo, Kalibo, Aklan kon sa siin ginasugid nga may market value raya nga P7,500.
Nakit-an sigon raya sa likuran nga parte it van nga ginamaneho it sangka retiradong police nga si Police Master Sargent Tranquilino Salazar Jr. matapos nga ginlimpyuhan ro anang saeakyan pagkatapos nga magpanaog ro mga pasahero sa andang terminal maeapit sa sangka mall sa banwa it Kalibo.
Suno pa kay PEMS Regatalio, indi pa matumod kon aksidente ukon hungod nga ginhueog ro narekober nga ginadudahang droga it posibleng pasahero it van bangud sa nakaplastar nga checkpoint sa banwa it Altavas ag iba pang kabanwahanan nga andang naagyan.
Ginatumod pa it mga otoridad ro pagkatawo it posibleng nagapanag-iya kara samtang ro ginapatihan nga shabu hay ginpaidaeom sa laboratory examination sa syudad it Iloilo.
