KALIBO, Aklan–Ginpaathag it Kalibo Municipal Police Station nga naka-istorya eon nanda ro daywang ka mga menor-de-edad nga babaye kaibahan ro andang ginikanan matapos nga mag-viral ro video kung siin makit-an ro andang pagsaeakitan sa Kalibo Pastrana Park.
Suno kay Police Lieutenant Aubrey Ayon, Deputy Chief for Operation it Kalibo Municipal Police Station nga nagkaayos eon ro magtimbang nga parte matapos nanda raya nga maka-istorya.
Base sa imbestigasyon it pulisya, may ginatawag nga “Clan” ro grupo it nasambit nga kababayin-an.
Ro nasaksihan sigon nga pag-away nanda hay kaparte it ginatawag nanda nga “sport”.
Owa sigon it naging dating alitan ro magtimbang nga parte kundi daea eamang raya it kantyawan.
Bangud kara, nakipag-coordinate eon sigon sanda sa barangay ag Department of Social Welfare and Development (DSWD) para magdesinyo it panibag-ong programa sa mga pamatan-on agud nga malikawan ro kaparehong hitabo.
Gin-engganyo man kara ro mga ginikanan nga bantayan it mayad ro andang mga unga ag usisaon it mayad ro andang aktibidad.
