KALIBO,Aklan–Ginapatihan nga ginuyod ag ginhueog sa sapa ro eawas it biktimang si Roselle Ann Invina-Rodriquez sa maySitio Mangga, Brgy. Torralba, Banga.
Suno kay PCapt. Benny Jones Mendoza, Hepe it Banga Municipal Police Station nga sandig sa andang padayon nga ginapatigayong imbestigasyon hay nakakita sanda it mga blood stains ag buhok it biktima sa may nasambit nga lugar.
Ginatan-aw sigon nanda ro anggulo it pagsukoe it biktima antes nga daeayon rayang namatay.
Ginpahayag dugang nga may daywang ka eaeaki sandang ginamonitor makaron nga ginakabig nga person of interest sa likod it insidente kon sa siin sanda ro ulihing nakit-an nga kaibahan it biktima sa sangka namatyan hasta nga uwa eon raya nakauli.
Sa pihak sigon it kawad-an it witness sa insidente, sa bulig it mga pumueyo ag konseho it Brgy. Torralba hay madasig nga nagadaeagan ro kaso ni Roselle./
Nasayuran nga ro ginakabig nga daywang person of interest hay nagatrabaho kay Aklan board member Nemesio Neron.
Sa makaron, indi pa sigon nanda mapaguwa ro pagkakilaean-an it daywa bangud sa nagapadayon pa ro pagtipon nanda it mga nagakaigong ebidensya angot sa kaso.
Sa pihak nga parte, sandig sa resulta it ginpatigayon nga post-mortem examination sa bangkay it biktima hay nakitaan raya it pilang tama it pagbuno ag sambilog sa ginatan-aw nga gintunaan it anang hinali nga kamatayon.
Nakataeana man nga igapaidaeom sa autopsy ro bangkay it biktima para matumod kun ginhimusean gid man baea raya antes nga patayon it mga owa pa nakilaeang mga suspek.
