KALIBO, Aklan—Ginpaidaeum sa hugut nga granular lockdown ro daywang ka purok sa banwa it Tangalan matapos nga magtaas ro kaso it COVID-19 sa nasambit nga mga lugar.
Suno kay Tangalan mayor Gary Fuentes nga ginpatigayon ro lockdown sa pilang parte it Purok 2 ag Purok 5 sa Barangay Dumatad, Tangalan bangud sa 14 nga ka tawo nga nag-positibo sa COVID-19.
Apekado it nasambit nga lockdown ro 13 nga ka panimaeay sa purok 2 ag waeo nga baeay sa purok 5 nga nauna eon nga gintaw-an it local government unit ag ko opisina ni Aklan 2nd District Rep. Teodorico Haresco, Jr. it supply it pagkaon.
Nakaangkon it pagtaeapnan it sakit sa daywang mga purok bangud nga haeos naga-ililiping eamang ro mga baeay.
Kaeabanan sa mga nagpositibo sa sakit hay naga-edad it 21 hasta 78 anyos kun sa siin 8 ro nakaangkon it sintomas.
Sa pinaka-ulihi nga listahan ko Hulyo 5, 2021 kapin sa 114 eon ro kabilugan nga numero it mga kumpirmadong kaso it COVID-19 sa banwa it Tangalan, kun sa siin 40 ro active cases ag ap-at ro namatay.
Sa makaron hay nagapadayun pa sigon ro contact tracing sa mga nakasalamuha it tinamaan it deadly virus.
Samtang, sa 15 nga barangay it Tangalan ro mga nabukid nga parte it barangay Vivo, Lanipga, Tamokoe ag Napatag ro nagapabilin nga zero Covid-19 cases umpisa nga magtuhaw ro pandemya.
