KALIBO, Aklan – – – Arestado ro daywang sibilyan matapos nga madakpan it mga matag-as nga kalibre it baril samtang nakatambay sa guwa it sangka videoke bar sa Brgy. Yapak sa isla it Boracay.
Nakilaea ro mga suspek nga sanday Edu Laman, 37 anyos, residente it Lambunao, Iloilo ag Alejandro Adorador , 25 anyos it Badiangan, Iloilo, parehong nagatrabaho sa sangka stingray watersports.
Sa ginpatigayon nga imbestigasyon it boracay tourist assistance center ukon BTAC, ginpahayag ni PO1 Lita Berdandino nga naaresto ro daywa it PNP Maritime Group sa may Sitio Ilig-Iligan matapos nga makabaton it tawag nga may daywang eaeaki nga nagabitbit it matag-as nga klase it armas sa nasambit nga lugar.
Naghana pa nga magdaeagan ro mga suspek kat maispatan nga nagapa-abot ro mga pulis, apang natigayon sanda nga nakorner it mga otoridad.
Nabo-oe sa posesyon ag kontrol ni Laman ro sangka M16-A1 nga kargado it 15 nga bala ag 9mm luger nga may ap-at nga mga bala.
Nabo-oe man kay Adorador ro kaparehong baril nga kargado it 18 nga bala.
Nagpatigayon man it background check ro pulisya sa mga suspek pati ro ginhalinan it baril nga owa it nagakaigo nga dokumento.
Ginpaidaeaum sa inquest ro mga eaeaki para sa kasong pag-eabag sa RA 10591 ukon comprehensive firearms and ammunition regulation act .
