KALIBO, Aklan — Magapatigayon it maeapnagong prayer rally ro libo-libong Duterte Die-hard supporters (DDS) Aklan chapter bilang kaparte it selebrasyon it ika-80 anyos nga kaadlawan ni dating Pangueong Rodrigo Duterte makaron nga adlaw, Marso 28.
Suno kay Rossini Sayman, organizer it DDS Aklan chapter, ro nasambit nga programa hay igapatigayon sa ground it Jetty Port sa Brgy. Pook, Kalibo bandang alas-6:00 it gabie.
Ginaeauman suno kana ro kapin sa ap-at nga libong katawo nga magapasakop sa nasambit nga event kon sa siin may pilang ka aktibidad nga pagahimuon kaparehas it pagtao it mensahe it mga gin-imbitahan nga personalidad.
Kaibahan eon kara ro pagpangamuyo para sa dating presidente nga maibalik sa nasyon matapos nga temporaryong gindetini sa International Criminal Court (ICC) detention facility halin kat gin-aresto imaw ag ginbyahe paadto it The Hague, Netherlands ko Marso 11.
Ginpahayag dugang ni Sayman nga ro nasambit nga programa hay boluntaryo nanda nga gingastusan halin sa andang t-shirt ag iba pang kinahang-eanon.
Hugot sigon sanda nga nagasuporta sa pamilya Duterte kapin eon sa dating presidente nga may mabahoe nga bulig sa pagtapna it illegal nga droga ag pagpanaba it krimen sa nasyon sa idaeom it anang administrasyon.
