KALIBO, Aklan—Medyu maduea-an it pueos ro pag-impeach it manaba nga kapueongan it kongreso kay Vice President Sara Duterte-Carpio.
Suno kay Atty. Axel Gonzales, sangka kilaeang abogado sa aklan nga makabig nga dead on arrival ro naka-pending nga impeachment case it bise presidente sa senado bangud sa kakueangan it boto nga pwede kara nga mabo-oe .
May question of law suno kana sa nasambit nga kaso bangud nga pila sa mga nag-impeach kana sa kongreso hay owa nagdaog ko nagtaliwan nga eleksyon.
Bangud kara, owa sigon it may magatindog nga house prosecutor ag bawae ro replacement.
Mag-eowas kara, kaabuan sa mga nagdaog nga senador hay kaalyado it mga Duterte rason nga imposible nga maangkon ro 2/3 votes ukon 16 nga senador nga required agud nga mapahalin sa pwesto si VP Sara.
Samtang, dugang pa ni Atty. Gonzales nga raya ro kauna-unahan nga kahigayunan nga nakaangkon it transition halin sa 19th paagto sa 20th congress it Kamara ag Senado sa pagbuyot it impeachment trial rason nga owa it pagasundan nga jurisprudence.
Bangud kara, nagapati imaw nga ro nasambit nga kaso hay maka-abot pa sa korte suprema bangud sa legalidad kon sin-o ro angay ag bagay nga magabuyot sa kaso.
