Ginakabig sa makaron it mga residente sa may bahin it Estados Unidos ro pinakamasubo nga naging Paskwa matapos nga ma-eksperyensyahan ro sambilog sa pinakamakamaeatay nga winter storm sa mismong adlaw it Paskwa.
Ro nasambit nga winter storm hay na-eksperyensyahan matapos ro limang dekada.
Suno kay Bombo International Correspondent Greg Aguilar it United States nga gaabot eon sa kapin milyon-milyon ka mga pumueuyo ro apektado sa maeapnagon nga winter storm.
Kung siin kapin sa 1.7 million man ka mga panimaeay ro nadueaan sa makaron it suplay it kuryente nga kung siin mas nagadugang it kalisod sa mga pumueuyo.
Nagdaea sigon ro bomb cyclone it snow, mabaskog nga hangin ag grabe nga pagnaba it temperatura, kung siin nakapalista eon it indi magnaba sa 26 katawo ro namatay.
Kaeabanan sigon sa gintunaan it kamatayon it 26 katawo hay matapos nga mastranded sa sueod it andang saeakyan.
Kaeakip man kara ro mga road traffic accident kaibahan ro 50 nga saeakyan nga nagbungguan nga nagtuga it pagkamatay it ap-at nga motorista.
Zero visibility man sigon ro nae-eksperyesyahan sa may Buffalo ag New York state.
Samtang, maskin ro milder southern state it Florida ag Georgia hay owa man naka-eowas sa manabang temperatura.
Sa makaron , nagdeklara eon ro US government it state of calamity sa nasambit nga mga lugar para maangkon eon it mga residente ro assistance nga ginakinahangean.
Sa pihak nga parte, gina-eauman nga hasta lang makaron nga adlaw ro nae-eksperyensyahan nga grabeng kaeamig ag hin-aga hay maga-umpisa eon ro pagdugang-dugang it temperatura.
