KALIBO, Aklan—Ginahinyu makaron it pilang mamalidha sa Commission on Elections (Comelec) nga paeawigon ro deadline it voter registration para sa nagahilapit nga 2022 national and local elections.
Raya hay kasunod it ginapatuman nga paghugut sa pilang parte it nasyon matapos nga makaangkon it pagtaas sa kaso it COVID-19.
Bangud kara, temporaryong ginsaraduhan ro mga field office it Comelec rason nga indi makapa-rehistro ro mga pumueoyo.
Suno kay Crispin Raymund Gerardo it Comelec-Aklan nga posibleng ginakonsidera ag ginatun-an eon it mga commissioner ro hinyu it mga mamalidha.
Sa makaron suno kana hay naka-work from home ro mga empleyado it taeatapan matapos nga ginpatuman ro Modified Enhanced Community Quarantine (MECQ) sa Aklan ag napaeawig pa hasta sa katapusan it Agosto sandig sa anunsyo it National Inter-Agency Task Force.
Bilang temporaryong solusyon, posible sigon nga magdownload anay ro mga pumueoyo it registration form ukon mag-adto sa opisina it election officer para magbuoe kara.
Sa oras sigon nga matapos eon ro pag-fill up hay kinahang-ean nga personal nga mag-adto sa opisina it Comelec para sa pagbuoe it biometric.
Nasayuran nga nakataeana eon nga magtapos ro voter registration sa Setyembre 30, 2021.
Nagapati man si Gerardo nga ro tuyo eamang it mga paghugut hay para sa kamaeayran ag kaeuwasan it tanan.
