KALIBO, Aklan — Ginpadumdum it Commission on Elections (Comelec) sa mga nagdaeaog nga kandidato sa May 13 midterm elections nga magsumite it andang Statement of Contributions and Expenditures (SOCE).
Suno kay Crispin Raymund Gerardo, tagapaghambae it Comelec-Aklan nga base sa Comelec resolution no. 10505, indi makapungko ro sangka kandidato sa anang pwesto kun indi raya makasumite it anang SOCE.
Pagakabigon man nga bakante ro opisina ukon posisyon it sangka elected candidate nga mapas-eawan nga makapasa it SOCE ag indi nakapanumpa sa sueod it an-um nga buean halin sa anang proklamasyon.
Ginpahayag ni Gerardo nga tanan nga kandidato ag mga partido nga nagpadaeagan sa May 13 national ag local elections, daog man ukon pierde hay kinahangean nga magpasa it andang SOCE nga indi mag-eampas sa June 12, 2019.
Indi eon sigon pagabatunon it poll body ro mga magapasa nga eampas sa gintaeana nga deadline.
Pagapapanaugan man it multa ro mga late submission it SOCE.
