KALIBO, Aklan—Kadungan sa unang death anniversary it basketball legend nga si Kobe Bryant, gindumdum it anang mga fans sa Aklan ro anang kamayad ag kamaeayran, kun sa siin hay ginhimo imaw nga inspirasyon.
Suno kay coach Rey Solano it banwa it Ibajay nga sa kamatuoran hay nagpa-obra sigon si Ibajay mayor Joen Miraflores it drawing it itsura ni Bryant sa andang gym bilang pagkilaea sa anang talent bilang sambilog sa ginakabig nga pinakamayad nga player sa kasaysayan it basketball.
Sa batang edad man suno kana hay naeakip ro ginakabig nga “black mamba” sa pagiging “hall of famer” nga nagsunod sa tapak ni Michael Jordan.
Nakilaea man raya bangud sa anang mayad nga pagbinatasan sa anang mga fans ag iba pang mga atleta.
Hasta sa makaron suno kana hay maabu ro nagakanugon ag nagakasubo sa anang pagkamatay may sang dag-on eon ro nagtaliwan.
Madumduman nga sa edad nga 41-anyos, si Bryant nga five-time NBA champion it Los Angeles Lakers ag two-time Olympic gold medallist hay namatay sa sangka helicopter crash kaibahan ro anang 13-anyos nga unga nga si Gianna ag pitong iba pa.
Sa pihak nga parte, nagaeaum si coach Solano nga pasugtan eon it National Inter-Agency Task Force ro uman nga paghampang it basketball agud nga bukon eamang it puro online games ro pagatutukan makaron it mga pamatan-on sa tunga it pandemya.
