KALIBO, Aklan—Nadugangan it daywa ro numero it mga binawian it hueam nga kinabuhi bangud sa covid-19 sa bilog nga probinsya it Aklan.
Raya hay sandig sa pinakaulihing datos nga ginpaguwa it Aklan Provincial Epidemiology Surveillance Unit it Provincial Health Office.
Angot kara, nagtaas eon sa kabilugang 298 ro mga namatay bangud sa deadly virus sa Aklan halin kat nag-eopok ro pandemya.
Sa pihak kara, nadugangan man it 56 ukon 28 porsyento nga positivity rate ro listahan it mga kumpirmadong kaso it covid-19 halin sa 196 nga mga swab samples nga gintest sa laboratoryo it Aklan provincial hospital ko nagtaliwan nga adlaw.// sa nasambit nga numero, tig-sambilog ro naghalin sa banwa it Altavas, Buruanga, Malay ag Tangalan; tig ap-at ro halin sa munisipalidad it Batan ag Malinao; 17 sa Banga; 14 sa Kalibo ag 12 sa Numancia.
Sa kabilugan, ro Aklan hay nakalista eon it 11,767 nga kaso it mga tinamaan it deadly virus.
Sa pihak kara, nagaabot eon man sa kabilugang 10,904 ro total recoveries bangud sa 64 nga mga bag-ong nagmayad halin sa deadly virus matapos nga nagpaidaeom sa pagbueong ag quarantine procedure.
Sa makaron hay may 565 pang aktibong kaso nga ginamonitor it PHO nga ginakaeakipan it 321 nga una sa facility quarantine, 177 ro naka-home quarantine ag 67 ro admitted.
