Nagsaka eon sa 111 nga katawo ro numero it mga namatay matapos tumama ro magnitude 7.4 nga linog sa nakatungdan nga parte it Colombia, adlaw it Lunes.
Nagsaka man sa 87 nga iba pa ro naninahan samtang padayun ro rescue operation sa mga tawong posibleng na-trap sa idaeum it mga nahugos nga building sa nagkaeain-eain nga siyudad.
Sa datos it U.S. Geological Survey may daeum nga 107 kilometro ro linog maeapit sa San Jose del Palmar, probinsiya it Chocó.
Mabaskog man nga nabatyagan ro pag-uyog sa pilang mabaskog nga siyudad sa bilog nga nasyon.
Raya ro unang mabahoe nga krisis nga paga-atubangon it bag-ong administrasyon ni Colombia President Abelardo De La Espriella, pilang adlaw eamang matapos imaw nga magpanumpa sa puwesto.
Bangud kara, gindeklara eon ni De La Espriella ro national state of emergency ag ginhambae nga haum ro bilog nga gobyerno agud nga magpatigayon it rescue operations ag maghatud it bulig sa mga apektadong komunidad.
Suno kana nga nagapangunang prayoridad it anang administrasyon ro maeowas ro mga tawong na-trap sa idaeum it mga nahugos nga istruktura.
Naging mas sensitibo man ro sitwasyon bangud nga preska pa sa rehiyon ro epekto it mabaskog nga linog nga tumama sa kaiping nga nasyong Venezuela ko Hunyo.
