KALIBO, Aklan—Aminado ro delegado it Aklan sa patag it athletics nga medyu nabudlayan sanda sa pag-angkon it medalya sa bag-o eamang natapos nga Batang Pinoy-Philippine Youth Games nga ginpatigayon sa nagkaeain-eain nga venues sa Metro Manila.
Suno kay Jovie Ote, sangka manugturo ag coach it athletics nga sangka bronze eamang ro andang naiuli, apang kaabuan sa anang 11 tanan nga bitbit nga atleta hay nakasueod sa final match.
Sa patag it swimming ag pencak silat suno kana medyu nakabawi ro Aklan sa paghakot it medalya.
Samtang, ginreklamo nana ro bag-ong patakaran makaron it Philippine Sports Commission sa pag-organisa it tournament bangud nga ginbuksan raya sa kada local government units.
Masyadong maabu suno kana ro mga participants rason nga masyadong mabuhay ro paghueat it mga atleta sa andang pag-perform sa kada event kun sa siin mag-eowas nga nagapaduea it momentum hay masyado pang mainit ro tiempo.
Samtang, maabu man suno kana makaron nga dag-on ro naka-break it record eabi eon sa athletics.
Sa andang pag-uli sa Aklan, ginpasaeamatan ni coach Ote ro mga nagbulig kanda eabi eon ro LGU New Washington nga nagtau it andang pamasahe ag iba pang kinahangeanon kamana man ro Department of Education ukon DepEd.
Sa makaron hay nagapadayun suno kana ro andang preparasyon sa pagsabak sa maabot nga unit ag provincial meet kamana man sa WVRAA ag palarong pambansa.
Nasayuran nga masobra sa 18,000 nga student-athletes nga naga-edad it napueo hasta beinte-singko ro nagpasakop sa 2023 edition it Philippine National Games ag Batang Pinoy umpisa ko December 17 hasta 22.
Tuyo kara nga masuportahan ag mataw-an it katumanan it mga pamatan-on ro andang handum pinaagi sa sports eabi eon ro pagsabak sa mga tournaments sa Southeast Asian Games, Asian Games ag hasta sa Olympics.