KALIBO, Aklan—Nagapanawagan it bulig ro mga residente it Barangay Taba-ao, Banga sa mga natungdan nga ahensiya it gobyerno agud nga makaangkon it maayos ag eowas nga daean pasaka sa gin-construct nga revetment wall sa nasambit nga lugar.
Suno kay nanay Jelly Retiro, sangka residente sa lugar nga owa sanda it ibang aeagyan paagto sa andang mga pananum sa tabok it suba kundi ro gintukod nga estaka nga masyadong mataas.
Nasayuran nga tatlong hut-on ro estaka, apang sa ikatlong parte hay owa raya it design nga hagdan rason nga mabudlay para kanda nga magpanaog paagto sa andang mga baesa kamana man nga mabudlay nga magpasaka it andang mga produkto.
May pilang residente eon man suno kana nga nahueog sa suba kun sa siin masyadong delikado bangud nga maabu nga jackstone sa ubos.
Nasayuran nga ro nasambit nga proyekto hay ginapanag-iyahan it Department of Public Works and Highways ukon DPWH agud nga maprotektahan ro lugar sa soil erosion ukon pagkatiphag it eugta.
Sa pihak nga parte, aminado si Punong Barangay Rowen Reporen nga mabuhay eon raya nga problema.
Apang sa makaron hay may solusyon eon sanda kun sa siin preparado eon suno kana ro igabutang nanda nga tubo nga bueuytan sa butong nga hagdan nga ginbutang bilang temporaryong aeagyan.
