Kalibo Aklan ——-Sangka delivery truck ro bumaliskad matapos nga sumunggab sa sangka kongkretong pader sa Brgy. Toledo, Nabas.
Base sa report, ro nasambit nga behikulo hay may kargang 60 ka container it tubi halin sa Brgy. Nagustan sa nasambit nga banwa.
Suno kay P/Corporal Andrew Andrade it Nabas PNP, natabo ro aksidente bandang alas-5:30 it hapon kon sa siin naghana sandang mag-overtake sa tricycle apang naaeang-aeangan ro driver nga si Michael Palomata, 35-anyos, residente it Brgy. Nagustan sakay ro mga pahinante nga sanday Darwin Sajise it Brgy. Unidos, Nabas, Septon Sabay it Brgy. Poblacion ag tatlong iba pa.
Kaangot kara, nakakas sigon ro tie rod bar it nasambit nga saeakyan rason agud nga mawad-an it kontrol ro driver ag sumunggab sa kurae nga kongreto nga ginapanag-iyahan ni Mrs. Elda Montero.
Ginpahayag dugang nga minor injuries eamang ro naangkon it sambilog sa mga delivery boy nga insigida man nga naeapatan it medikasyon sa Ibajay District Hospital.
Samtang, nagkasugot sigon ro magtimbang nga parte nga ipaobra eon lang ro pader agud nga maibalik sa dati kara nga plastada.
