KALIBO, Aklan — Magapadayon makaron nga adlaw it Biyernes ro demolisyon sa napueong establisyimento sa isla it Boracay.
Suno kay Boracay Inter-Agency Rehabilitation Management Group (BIARMG) general manager Natividad Berdandino, ginpadayon nanda ro demolisyon matapos nga nag-isyu si Acting Mayor Frolibar Bautista it Executive Order No. 038 nga i-resume ro pagguba sa mga establisyimentong nadiskubrehan nga nag-eabag sa coastal ag road easement.
Ginpahayag dugang nga nag-expire eon ro ginpapanaog nga Temporary Restraining Order ukon TRO it Aklan Regional Trial Court Branch 7 kontra sa mga establisyimentong ginakaeakipan it Aira beach front boracay hotel; Ventoso Residences; Freestyle Academy; Kite Surfing School; Kite Center ag Banana Bay; Wind Riders Inn; Pahuwayan Suites; Lumbung Residences; Boracay Gems, ag 101, 107 of Seven Stones Boracay Suites.
Suno pa kay Berdandino, maskin nga magreklamo pa ro mga business owners, uwa gihapon sanda it mahimo kundi sundon ro laye bangud nga nag-eabag ro mga raya sa 25-plus-five easement nga ginapatuman sa nagapadayon nga rehabilitasyon it isla it Boracay.
Ginpahayag dugang nga may tatlong establisyimento nga syento porsyentong nakasueod sa easement ro andang structute samtang ro iba hay 20 hasta 30 porsyentong structure nanda ro ginguba.
Madumduman nga ro napueong residential ag commercial building hay una eon nga nag-request it TRO sa Aklan RTC ko October 15 kon siin ginpaburan sanda it korte ag temporaryong ginpapundo ro pagtibag sa sueod it 20 diyas.
