KALIBO, Aklan – – – Naga padayun ro demolisyon sa mga iligal nga istraktura sa isla it Boracay.
Matapos nga malimpiyuhan ro Puka Beach sa Brgy. Yapak, gina tutukan sa makaron it LGU-Malay ro front beach kun siin gina pakaskas ro mga istraktura nga nag eabag sa patakaran it Department of Environment and Natural Resources (DENR).
Kaeakip sa mga gina demolish ro mga stalls ag mga establisimento nga nagpatukod sa mga gina bawaean nga lugar nga maeapit sa baybayon.
Pila sa mga hotel ag resort owners man ro naga alburuto matapos ro pagkumpiska ag pagkakas sa mga istraktura.
Samtang, sa gin patigayung operasyon, sangka tubo nga naghalin sa sangka spa ro natukiban nga gina panag iyahan it sangka Koreano ro direktang naga pilak it andang waste sa baybayon.
Apang, suno sa andang staff, ro tubo hay naka-connect sa andang gutter para sa tubi-uean, apang, kat buksan makita kara ro mabaho ag maitom nga tubi nga naga halin kara.
Samtang, gina pakakas man sa sangka mabahoe nga hotel sa isla ro 15 steel posts nga andang gin butang maeapit sa baybayon bilang kaparte it paglimpiyo sa vegetation lines sa front beach it Boracay.
