KALIBO, Aklan–Gintaw-an it punto it Department of Environment and Natural Resources (DENR)-Aklan ro importansya it tamang pag-alaga sa dunang manggad it probinsya.
Suno kay Ma. Corazon Teodosio, Chief, protected area management and biodiversity Unit it DENR-Aklan nga dapat maayos nga mapangalagaan ro mga tanum ag kasapatan para malikawan ro grabeng epekto it climate change.
Sa programang Good Morning Philippines, gintalakay ni Teodosio nga dapat maprotektahan ro protected area ukon porsyon it forest land sandig sa mandato it laye.
Samtang, ro biodiversity man hay nagatumod sa manggad nga indi magnaba sa pangmabuhayan nga tyempo ag mapangalagaan ro potensyal kara para masolusyonan ro mga kinahang-eanon hasta sa paeaabuton.
Gin-insister pa ni Teodosio nga hugut nga ginabawaean it taeatapan ro pagdakop it mga kasapatan ag tanom nga naeakip sa endangered ag critically endangered species.
Ro sin-o man nga mag-eabag sa kasuguan hay posibleng magpangatubang it nagakaigo nga penalidad.
Ginapasugtan eamang sigon nanda ro pribadong pag-alaga it pilang wild animal kung naghalin raya sa wildlife farm nga may permit halin sa DENR.
Buot hambaeon, indi pwedeng magdakop ukon mag-alaga it mga endangered species halin sa kabukiran.
Ginpahayag dugang nga maabu eon nga indibidwal ro nagdangop sa andang taeatapan para iturn over ro mga nadakpan nga wild animal para makalikaw sa penalidad.
