Kalibo Aklan ——–Nagapadayun ro pag-usisa it Department of Environment and Natural Resources (DENR) Aklan sa cadastral survey kon may naga-eksister gid man nga creek sa ginatindugan makaron it sangka car care business nga ginapanag-iyahan it pamilya Villar sa diversion road sa Brgy. Mambog, Banga.
Suno kay OIC PENRO Merlyn Aborca it DENR-Aklan nga magapatigayon man sanda it on site inspection sa nasambit nga lugar para sa paghimo it nagakaigo nga rekomendasyon .
Ginpaathag kara nga ro mga creek hay dapat nga i-preserve maskin pa nga nakasueod raya sa private property bangud sa papel kara sa eco-system kamana man nga dapat nga may 20 meter easement raya ukon distansiya sa istraktura .
Madumduman nga nauna eon nga nagpadaea it sueat si Municipal Engineer Hermie Seraspi it LGU-Banga sa DENR agud nga matumod kon may water ways sa lugar ag kon ham-an nga napatindugan raya it istraktura sa tituladong eugta it mga Villar .
Gina-insister it mga pumueuyu nga may creek sa lugar nga ginatawag nanda nga “kumaeamog creek”, apang sa pag-inspection it Department of Public Works and Highways (DPWH-Aklan), Municipal Engineering Office it LGU-Banga ag Barangay Council hay indi eon nanda raya makita ag ginbutangan eon it box culvert .
Mag-eowas kara, owa naka-reflect sa mapa it DENR nga may creek sa nasambit nga lugar .
Madumduman nga nakaangkon it owa pagka-ilintindihan ro pamilya Villar ag mga residente nga naga-istar sa interior nga portion it lugar matapos nga owa eagi gin-repair ro nagabot nga box culvert nga naga serbi man nanda nga road-right-of-way rason nga naging mabudlay ro andang pagguwa .
Ginpamilit sigon ni Mr. Villar nga sanda ro nagapanag-iya it property rason nga nakadepende kana kon hin-uno raya paga-ayuson.
Pinaagi sa pagpatunga it mga natungdan, ginpa-repair eon lang it negosyante ro nasamad nga portion it box culvert nga nahalitan it delivery truck bilang temporaryo nga solusyon .
Gina request man makaronn ni Mr. Villar nga i-relocate ro nasambit nga aeagyan it tubi nga nakasueod sa anang private property rason nga gindangop raya sa DENR .
