KALIBO, Aklan — Aminado ro Department of Environment and Natural Resources (DENR) nga bisan sanda hay pikon eon sa mga turistang pasaway nga naga-eabag sa ginapatuman nga bag-ong rules and regulations sa isla it Boracay.
Sa interview it Bombo Radyo, ginpamalibaran ni DENR Undersecretary Benny Antiporda nga may nasampolan eon nga mga violators kapin eon ro naga-eabag sa pagpanigarilyo, pagkalhit it basura ag pag-inom it aeak sa beachfront.
Sa makaron sigon hay puro “warning” pa eamang ro andang ginahimo bangud ginahueat pa nanda ro igapaguwang Executive Order ni OIC Malay Mayor Abram Sualog agud makaangkon it ngipon ro ordinansang nagasakop kara.
Kon imaw sigon ro masunod, bukon it kwarta ro gusto kara nga iimponer nga penalidad kundi ro community service agud ipahuya ro mga turistang pasaway.
Nasayuran nga antes makasueod sa isla hay kinahang-eang magpirma it mga turista sa “Oath for a Better Boracay” agud sumunod sa environmental laws and regulations.
Samtang, halin kat ginbuksan ro Boracay sa publiko ko Oktubre 26, ginpahayag ni Usec. Antiporda nga kaeabanan sa mga turistang nagabisita hay napahanga sa bag-ong hitsura it isla kapin eon sa kalimpyuhan it frontbeach apisar nga kueang pa ro mga amenities bangud sa nagapadayon nga rehabilitasyon.
