KALIBO, Aklan — Plano it Department of Environment and Natural Resources (DENR) nga himuong tourist destination ro mga marekober nga wetland area sa isla it Boracay.
Suno kay Community Environment and Natural Resources (CENRO)-Boracay OIC Atty. Richard Fabila nga paga kumbinyuhon nanda ro LGU-Malay ag iba pang mga private investors nga maging partner sa pagpanami ag paggamit it nasambitang mga wetlands bilang tourist destination sa oras nga matapos ro gina patigayung rehabilitasyon.
Nakapahaum eon sigon ro design ag proposal sa nasambitang plano, kun siin sambilog sa mga kundisyon nga indi magabutang it advertisement ukon pangaean it kompaniya sa lugar.
Suno kay Atty. Fabila sa oras nga matapos ro paglimpiyo sa mga iligal nga istraktura sa mga wetland area hay paga butangan ro mga raya it park, fountain, butterfly ag firefly farm agud makatao it kasadyahan sa mga bisita.
Kasunod kara, padayun ro apela it taeatapan sa mga residente nga makipagbueoligan sa nagapatuloy nga demolisyon sa mga illegal structures nga kaabuan hay mga boarding houses sa wetland area no. 5 ag 6 sa mangrove area sa Sitio Lugutan ag Tulubhan agud indi eon ma-delay ro pagbukas it isla bangud sa isyu it coliform.
