KALIBO, Aklan — Nagpaandam si Department of Environment and Natural Resources (DENR) Secretary Roy Cimatu nga indi kara iga rekomendar ro uman nga pagbukas it Boracay sa mga turista engkasong indi malimpiyuhan ro tubi.
Raya hay kasunod it andang pag-inspeksyon sa mga gin kutkot nga naka-eubong nga iligal nga tubo sa tatlong area sa frontbeach sa Barangay Balabag nga nagiging rason it polusyon sa kaeawuran sa isla.
Sa gin patigayung pag eksamin sa water sample, naging positibo raya sa fecal coliform bacteria.
Naging madasig sigon ro pag-locate makaron sa mga illegal pipes sa bulig it ground penetrating radar sa pagpanguna ni Liza Socorro Manzano, supervising science research specialist it MGB.
Samtang, gin pahayag ni Cimatu nga sa madason nga dominggo hay maga umpisa ro operasyon it MGB sa backbeach sa Bulabog area.
Apisar sigon gin takpan eon ro kontrobersiyal nga tubo, maga pabilin sa gihapon nga mahigku ro tubi idtu.
Mabahoe ro anang pagpati nga mag eowas sa nasambitang tubo nga nakita ni Pangueong Rodrigo Duterte nga imaw ronagpa-init it anang ueo hay maabo pang naka-eubong nga iligal nga tubo sa lugar.
Gin pamilit it sekretaryo nga raya hay naga pamatuod eamang nga pila sa mga establishmento sa Boracay hay owa naka-konekta sa mga sewage treatment facilities agbasta-basta eamang nga gina pagowa ro andang mga higku ag wastewater sa kaeawuran.
