KALIBO, Aklan—Ginpadumdum eon man it Department of Environment and Natural Resources ukon DENR-Aklan ro mga pulitiko ag mga supporter nga bawae ro pagpaskil ukon pag-eansang it mga poster, streamers ag political ads sa mga puno it kahoy.
Suno kay Merlene Aborka it PENRO-Aklan nga may lugar nga nakataeana para sa mga poster it mga political candidate.
Nakakasamad sigon it mga puno ro pagpaskil it mga posters , streamers ag political ads gamit ro mga eansang.
Kinahangean sigon nga haeungan ro mga puno agud nga mapahagan-hagan ro epekto it climate change.
Sa makaron hay nagapadayun ro andang monitoring ag sa mayad nga swerte sa pag-umpisa it campaign period sa national level hay owa sanda it may nakita nga nag-eabag sa PD 953 ukon pagbawae sa pagputoe, pagsamad sa puno it kahoy sa public roads, plazas, parks, schools, ukon sa mga pampublikong lugar.
Engkaso nga maduso ro kaso, raya hay may penalidad nga 500 hasta 5,000 pesos ukon pagka-presu nga 6 nga buean hasta daywang dag-on.
Sa pihak nga parte,ginlaygayan man nana ro mga politiko ag mga tagasuporta kara nga i-recycle ukon i-dispose it tama ro mga campaign materials pagkatapos it eleksyon eabi pa ag kaabuan sa mga raya hay himo sa plastic.
