KALIBO, Aklan—Bukon eamang sa game 1 ginpaburan nga magdaog ro Denver Nuggets kontra sa Miami Heat kundi sa serye it NBA finals.
Suno kay Bombo International Correspondent Greg Aguilar it California, USA nga owa napas-eawan ro mga nagpusta sa Nuggets sa game 1 matapos nga tambakan ro Heat sa score nga 104 to 93.
Antes sigon ro makahawat-hawat nga match-up hay naging betting favorite ro Nuggets it 9 points sa game 1 ag underdog ro Heat.
Apang bilog sigon ro bola ag may pamaagi ro Miami kon paalin nga maangkon ro kadaeag-an.
Makabig sigon nga makasaysayan engkaso nga magdaog ro Heat sa finals.
Sa pihak nga parte, ginpahayag pa ni Aguilar nga maabu ro nagapabor makaron sa Nuggets bangud nga ginakabig ro koponan nga excellent ag best player man sa NBA ro sentro kara nga si Nikola Jokic ag haeos tanan nga mga players.
Apang indi man sigon pwedeng ismolon ro mga player it Miami Heat sa pagpanguna ni Jimmy Butler ag Bam Adebayo.
Para kana, mas pabor imaw nga magadaog ro nuggets apang ro anang tagipusuon hay sa Heat.
Maabu sigon sa mga analysts sa US ro may prediksyon nga ro NBA finals hay hasta eamang it game 5 ukon 6 ag indi eon maka abot sa game 7.
Nasayuran nga tinambakan it Denver Nuggets ro Miami Heat sa Game 1 it NBA Finals, kaina sa score nga 104-93.
Uman nga naging dominante si Nikola Jokic ag nakalista it triple-double performance, 27 puntos, 10 rebounds ag 14 assists.
Mag-eowas kay Jokic, bumida man si Jamal Murray nga may una nga double-double performance, 26 puntos ag 10 assists.
Naging mabahoe man ro bulig ni Michael Porter Jr. matapos maglista man it double-double performance, 14 puntos ag 13 rebounds.
Si Aaron Gordon hay may amot man nga 16 puntos.
Samtang, magapabilin gihap0n ro hampang sa teritoryo it Nuggets.
Ro Game 3 ag 4 man hay pagahiwaton sa homecourt it Heat.
