Nagakadapat ag kinahang-ean gidman nga mapasabat ro mga opisyales it Department of Education ukon DepEd nga eakot sa anomaliya partikular ro pagpurchase it overpriced nga mga outdated laptops.
Raya ro naging reaksyon ni Mr. Raymund Basilio, secretary general it Alliance of Concerned Teachers (ACT) kasunod it ginpatigayon nga committee hearing kon sa siin ginrekomenda it Senate Blue Ribbon Committee nga pasakaan it mga kasong maanomaliya, perjury, falsification of public document, kasong administratibo ag sibil ro mga dati ag presenteng opisyal it DepEd ag Procurement Service it Department of Budget and Management (PS-DBM) nga eakot sigon sa P2.4 billion overpriced nga pagbakae it laptop.
Suno kana raya ro nagakadapat nga himuon para mataw-an it hustisya ro mga manugturo kon sa siin sa mismong boesa pa nanda sanda nagabueo it ginagastos para sa mga ginagamit sa eskwelahan.
Sa 197 panig it committee report, ginarekomenda nga kasuhan sanday Usec. Alain del Pascua, Usec. Analyn Sevilla, Asec. Salvador Malana III, Director Abram Abanil, PS-DBM OIC Dir. Lloyd Christopher Lao, PS-DBM acting Dir. Jasonmer Uayan, BAC Chairman Ulysses Mora, ag iba pang miyembro it SBAC 1 ag SBAC TWG secretariat ag staff.
Apang, bukon it kaibahan sa ginapakasuhan sanday dating DepEd Secretary Leonor Briones ag dating Budget Secretary Wendel Avisado bangud uwa it ebidensiya kontra kanda.
