Nakalista ro Department of Health (DOH) Region 6 it 257 nga bag-ong kaso it Human Immunodeficiency Virus (HIV) sa Western Visayas halin Enero hasta Marso 2025. Kaeabanan sa mga apektado hay una sa edad it 15 hasta 24 anyos.
Halin 1988 hasta it Marso 2025, umabot eon sa 6,242 ro kabilugang numero it kaso it HIV sa rehiyon.
Sa nasambit nga numero, 1,369 kaso ro natutukan it Family Planning Organization of the Philippines (FPOP) Iloilo Chapter. Nagaabot sa 443 nga kaso ukon 33 porsyento it kabilugang numero halin sa mga una sa edad it 15 hasta 24 anyos.
Suno sa FPOP, nagtaas ro numero it mga kaso halin kat gin-umpisahan ro pag-usisa sa mga indibidwal nga 15 anyos pataas, kumpara sa dating 18 anyos pataas eamang.
Sa pihak kara, maabo sa mga pamatan-on ro uwa naintindihan ro peligro it andang mga ginahimo hasta sa masayuran nga sanda hay positibo sa HIV.
Bangud kara, ginaduso ro “one-stop shop” approach sa mga kaso it HIV.
Ginaengganyo man ro mga ginikanan nga maging muk-eat sa mga aktibidad it andang mga onga eabi eon kon raya hay magatuga kanda it peligro.
