KALIBO, Aklan—Ginataw-an it igtaeopangod it Department of Public Works and Highways ukon DPWH-Aklan ro mga nagatuhaw nga potholes sa mga karsadahon sa probinsiya it Aklan.
Suno kay Engr. Joey Ureta, head it maintenance division it DPWH-Aklan, sangkiri eamang ro mga potholes sa parte it Aklan West Road ag anda ginatutukan makaron ro mga potholes nga nagatuhaw sa Aklan East Road.
Ro mga nagtuhaw sigon nga mga potholes hay bangud sa pag-uean-uean.
Pahayag pa nana, ginataw-an nanda it importansya ro pag-repair sa mga buho-buho eabi eon nga nagahilapit ro selebrasyon it Kalibo Sto. Nino Ati-atihan Festival.
Ginaschedule sigon nanda ro pag-repair it mga potholes halin sa Banga paagto sa Altavas agud amat-amat eon raya nga mabuhinan.
Ginpahayag dugang ni Ureta nga naging mahinay ro andang obra bangud sa pag-rotation it mga tawo.
Uwa pa sigon nakaabot ro andang augmentation fund ko 2023 ag bukon it bastante ro nabilin nanda nga pondo.
Ginpasiguro man ni Engr. Ureta nga andang pagahimuon it tama ag angay ro pag-repair it mga potholes bangud ro andang gin-ubra ko buean it Oktubre ag Nobyembre hay temporary patching of potholes.
