KALIBO, Aklan—Preparado eon ro Department of Education ukon DepEd Antique sa paghost it dag-unan nga Western Visayas Regional Athletic Association ukon WVRAA Meet 2025 nga igapatigayon halin Marso 1-8.
Sa interview it Bombo Radyo kay Antique Schools Division Superintendent Dr. Nicasio Frio, haom eon sanda sa pagbaton sa kapin 5,394 nga delegasyon nga ginakaeakipan it mga atleta, coaches, chaperoons, technical officials ag iba pa kon sa siin ginpreparahan gid nanda raya it husto.
Kapin sa P43 milyon pesos ro gin-alokar nga pondo para sa playing venues agud nga masigurado ro kaeowasan it mga atleta during sa anda nga mga hampang ag masobra sa P27 milyon pesos mat-a ro gin-alokar sa hosting expenditures nga ro pondo hay naghalin tanan sa local school board fund.
Samtang, kapin sa P31 milyon pesos ro gin-alokar nga pondo it lokal nga gobyerno it Antique para sa nagapadayon nga renovation it track oval field nga siguradong makahingabot sa kompetisyon.
Ginpahayag dugang ni Dr. Frio nga pag-aeabutan it mga delegates sa Antique hay ginasakto sa ginahimo nga ocular inspection.
Ginpasiguro pa it DepEd official nga makaangkon it komportable nga pagtinir ro mga atleta, coaches, chaperons ag iba sa gintaeana nga billeting areas para kanda.
Sa makaron suno kana hay uwa eon sanda it makabig nga major concerned nga nabaton pag-abot sa billeting quarters ag ginaeauman nga magiging maayos ro tanan hasta sa competition proper.
Samtang sa pihak nga parte, positibo ro DepEd Aklan nga inde maulihi sa pagkuhit it mga medalya sa tanan nga sporting events nga pagapasakupan it mga atleta.
Madumduman nga nabutang sa ikatlong pwesto ro Aklan sa overall ranking ko nagtaliwan nga WVRAA Meet 2025.
