KALIBO, Aklan–Gin-engganyo it Department of Education ukon DepEd-Aklan ro mga ginikanan nga ipalista ro andang mga unga sa maabot nga marso 26 nga imaw ro gintaeana nga early registration para sa School Year 2021-2022.
Suno kay Dr. Miguel “Mac” Aposin, Schools Division Superintendent it DepEd-Aklan nga ginpatigayon nanda ro early registration ukon tempranong pagpalista it mga estudyante, umpisa Marso 26 ag magabuhay it hasta sa Abril 30.
Pagahimuon sigon rayapinaagi sa remote registration.
Kaeabanan nga ginapatigayon ro early registration kada ulihing domingo it Enero kada dag-on apang bangud sa adjustment sa school calendar tuga it pandemya nga daea it coronavirus disease 2019 (COVID-19) hay nagbag-o man ro petsa it pagpatigayon kara.
Kaibahan sa mga pwedeng magpalista sa early registration hay ro tanan nga incoming Kindergarten, Grades 1, 7, ag 11 students sa tanan nga pampublikong elementarya ag secondary schools.
Tuyo it early registration nga mataw-an ro DepEd it kahigayunan nga makahimo it mga nagakaigong pagpahaum ag adjustment para sa pagbukas it klase.
