KALIBO, Aklan–Mabahoe ro pagsalig it Department of Education ukon DepEd sa mga school officials nga maobligahan ro andang responsibilidad para sa kamaeayran it mga inonga rason nga gintugyan it ahensya sa mga school heads ro desisyon kon magapatuman it mga class suspension bangud sa tuman nga kainit it panyempo nga nabatyagan tuga it El Niño.
Sa interview it Bombo Radyo Kalibo, ginpahayag ni Mr. Mar Bien Gregorio Parel, division information officer it DepEd Aklan nga may ginpaguwa nga memorandum ro ahensya ko nagtaliwan nga buean nga kon sa siin nakabaehag nga nakadepende sa school heads kon ipaiway ro klase bangud sa mainit nga panyempo.
May mga eskwelahan suno kana nga mainit ro kwarto ag uwa haeos it nakapalibot nga mga punong kahoy rason nga kon mabutang sa peligro ro ikaayong eawas it mga estudyante hay may awtoridad ro school heads nga magsuspinde it klase.
Nakahaom eon man suno kay Parel ro mitigating measures it DepEd para maeagas ro andang mga leksyon kaparehas it catch up Fridays para uwa it maaywanan nga sa adlaw nga uwa it face to face classes.
Apang sa makaron suno kana hay uwa pa it nakaabot sa andang taeatapan nga reklamo nga uwa ginasuspinde ro klase kon grabe ro init nga delikado para sa mga estudyante.
Hinduna it hapon suno kana, ro grade 3 it Bugasongan Elementary School sa banwa it Lezo hay suspindido ro klase bangud sa mainit nga panyempo.
