KALIBO, Aklan — Ginkalipay it Department of Education (DepEd)-Aklan ro 7th place sa overall division ranking sa bag-o eamang natapos nga Palarong Pambansa 2025 nga ginpatigayon sa Laoag City sa Ilocos Norte.
Suno kay Charlie Ureta, sports division officer it DepEd-Aklan, pinaagi sa outstanding performance it mga atletang Aklanon, naka-uli ro team Aklan it kabilugan nga 16 gold medals; 6 silver ag 4 bronze medals.
Ro nasambit nga numero it mga medalya nga ginboesa hay mas maabu kumpara sa naangkon ko 2024 Palarong Pambansa sa Cebu City nga nakaangkon eamang it 6 sa regular sports ag 6 man sa para games.
Posible suno kana nga nag-excell ro mga student athletes it Aklan bangud sa suporta nga gintau kanda partikular sa andang training.
Mabahoe man ro pagpasaeamat it DepEd Aklan sa pagpanguna ni Schools Division Superintendent Feliciano Buenafe Jr., kay Aklan Governor Jose Enrique Miraflores bangud sa andang bilog nga suporta sa mga atletang Aklanon.
Samtang, gindayaw man it DepEd Aklan ro pag-host it Laoag City sa makaron nga edisyon it sporting event bangud nga ginpahauman sigon raya it husto it provincial government it Ilocos Norte.
Haeos standard sigon ro tanan nga mga playing venues ag maskin nga may kalumaan eon ro ibang mga lugar hay ginbutangan raya it modern touch agud nga ma-enjoy it mga delegates ag iba pang mga bisita.
Mas pa nga pagapabaskugon it DepEd-Aklan ro pag-sanay sa mga atleta bilang preparasyon sa masunod nga mga sporting event eabi pa ag magaseparar eon ro Negros Occidental sa Western Visayas umpisa sa masunod nga dag-on.
