KALIBO, Aklan—Ginkumpirma ni Dr. Feliciano Buenafe, Jr., schools division superintendent it Department of Education ukon DepEd-Aklan nga nakabaton sanda it kontrobersiyal nga laptops nga gina-alegar nga outdated ag pricey.
Apang owa pa suno kana imaw nakasayod kon pilang bilog ro nabaton it DepEd-Aklan ag anong eskwelahan ro mga naging recipient kara.
Ginpasiguro man nana nga raya ro anang pagatutukan sa pagahimuon nga inventory.
Madumduman nga sa 2021 annual audit report it Commission on Audit ukon COA, nadiskubre it komisyon ro pagbakae it DepEd it P2.4 bilyon it laptops nga maskin nga lipas eon sa panahon hay masyado pang mahae pinaagi sa Procurement Service it Department of Budget and Management maskin nga may una nga mas barato ag mas maayos nga option sa baealigyaan.
Gindugang pa ni Dr. Buenafe nga umpisa nga ma-assign sa probinsiya hay owa pa imaw it may nabaton nga reklamo halin sa mga manugturo nga nakagamit it nasambit nga laptop.
Posible suno kana nga maskin paalin hay nakabulig man raya kanda sa implementasyon it distance learning sa tunga it COVID-19 pandemic.
