KALIBO, Aklan—Ginpaathag it Department of Education (DepEd) ro pila ka mga rason kon ham-an it mahina ro mga estudyante pag-abot sa pagbasa kasunod it resulta it literacy assessment nga ginpatigayon it Organisation for Economic Cooperation and Development (OECD) kon sa siin nangulelat ro nasyon.
Suno kay Dobie Parohinog, Chief Education Supervisor it DepEd-Aklan, sambilog sa ginatan-aw nga rason kara hay ro by genetics; language barrier ag ro naga-umwad nga teknolohiya.
Mas ginapaeabi pa it mga inonga ro paghampang sa anda nga gadget kaysa sa pagbasa it mga reading materials nga ginaprovide it eskwelahan.
Mag-eowas sa reading comprehension, haeos nangulelat man ro Pilipinas sa Science ag Mathematics kon sa siin aminado si Parohinog nga mahina ro mga estudyante pag-abot sa mga fractions.
Nasayuran nga ro Beijing, Shanghai, Jiangsu ag Zhejiang sa China ro nagapanguna sa tanan nga kategorya.
Nagpangaywa man ro Singapore ag nagpangatlo mat-a ro Macau.
Samtang, nagpanawagan sa mga ginikanan si Parohinog nga suportahan ro educational needs it mga onga.
Suno kana, usisaon ro notebook it mga raya kon may mga assignments ukon ginapaobra ro mga manugturo.
Tan-awon kon may gamit pa sa eskwelahan ro mga estudyante ag tur-an man ro mga raya kon una eon sa tagsa ka panimaeay.
