KALIBO, Aklan—Ginpasiguro it Department of Education ukon DepEd-Aklan nga haeos 90 porsiyento eon sanda nga haum para sa pagbukas it klase sa Lunes, Hulyo 29.
Suno kay Mar Bien Gregory Parel, Division Information Officer it DepEd-Aklan nga tuyo it andang ginpatigayon nga launching it Pahisayud, an education hour kaibahan ro mga katapo it media hay agud nga matalakay ro kahauman it schools division it Aklan angot sa Oplan Balik Eskwela.
Preparado eon sigon sanda sa school opening kun sa siiin nagbueuligan ro mga manugturo, ginikanan ag natungdan nga stakeholders sa Brigada Eskwela nga gin-umpisahan makaron nga domingo .
Raya suno kana hay sangka dag-unan nga school maintenance program it DepEd agud nga maging haum ro mga eskwelahan sa pagbalik-eskwela it mga estudyante.
Ginklaru man ni Parel nga umpisa makaron nga school year, ginkakas eon ro subject nga mother tongue sa idaeum it ginlunsar nga MATATAG K to 10 Curriculum.
Apang magapabilin raya nga medium of teaching and learning sa mga eskwelahan nga nagakahueugan nga ro kaugalingon nga dialekto gihapon ro pagagamiton nga lenggwahe sa pagturo agud nga madali sigon nga maeubtan it mga learners ro leksyon.
Ro critical thinking skills it mga inunga suno kana ro ginapabaskog makaron it ahensiya .
Samtang, padayun suno kana ro pagbaton it mga magapa-enroll nga ginpa-isoe hasta sa Agosto 5.
