Ginaeauman it Department of Education ukon DepEd Aklan nga madugangan pa ro mga enrollees nga nailista sa mga pampublikong eskwelahan kon sa siin magabuhay hasta sa adlaw it Biyernes ro andang monitoring nga siguradong may magaeagas pa sa pagpalista para sa school year 2025-2026 maskin nga nagbukas eon ro klase ko adlaw it Lunes, Hunyo 16.
Suno kay Mar Bien Gregory Parel, division infromation officer it DepEd Aklan nga base sa andang learning information online, nakalista ro ahensya it kapin sa 110,237 enrolles sa public school nga ginaeauman pa nga madugangan hasta sa adlaw it Biyernes.
Samtang, sa mga probibadong eskwelahan hay nagaabot sa 17,509 ro andang enrollees; sa local state universities hay kapin sa 120 pa eamang ro enrolless ag sa alternative learning system ukon ALS hay nakalista sanda it 1,001 enrolless.
Ginpahayag dugang ni Parel nga ro nasambit nga mga numero hay bukon pa it pinal ag posibleng madugangan pa sa mga masunod nga inadlaw.
Sa pihak kara, naging madinaeag-on suno kana ro pagbukas it school year 2025-2025 sa bulig it andang mga stakeholders, mga ginikanan ag iba pa.
Makit-an ro ibang estudyante nga nakauniporme kon sa siin una eon sa alima it mga school heads kon pagastriktuhan ro andang mga estudyante nga magsuksok it uniform. May mga eskwelahan suno kana nga ginataw-an it konsiderasyon eabi eon sa mga maeayo nga lugar.
