Uman nga nagpadumdum ro Department of Education ukon deped-aklan sa tanan nga mga pampublikong eskwelahan sa elementarya ag sekundarya nga hugut nga ipatuman ‘no collection’ policy.
Suno kay Dr. Feliciano Buenafe, Jr., schools division superintendent it department of education ukon deped-aklan base sa andang polisiya, ginabawae sa tanan nga mga opisyal it eskwelahan nga magkolekta it anumang baeayran sa enrolment ag sa mga unang adlaw it klase.
Raya hay kasunod it reklamo it sangka ginang kontra sa Taba-ao primary school.
Base sa reklamo, indi sigon i-release ro report card it anang daywang gumankon bangud sa baeayran sa eskwelahan nga naga-abot sa masobra sa 3,700 pesos kun sa siin kaabuan kara hay multa it andang ama sa pirmeng owa pagtambong sa meeting it Parents-Teachers Association.
Gina engganyo sigon ro tanan nga mga unga nga sa tamang edad nga mag-eskwela.
Ginpahayag ni Dr buenafe nga kon may problema pa sa mga baeayran ukon dokumento hay pwedeng ilista bilang temporary enrolled ro sangka estudyante.
Maskin nga ginapasugtan it deped ro pilang mga kontribusyon ukon aeamutan, apang raya hay magapabilin nga voluntary.
Ro kada eskwelahan suno kana hay may gintaeana nga Maintenance and Other Operating Expenses ukon MOOE para sa mga gaeastuson eakip ro bayad sa gwardiya ukon tanod.
Ginakumbinyo man nana ro mga may reklamo nga magdangop sa andang taeatapan agud nga insigidang maaksyuan it anang ginbilog nga team .
