KALIBO, Aklan—Nagpahayag it pakikisimpatiya ro Department of Education (DepEd)-Aklan sa pamilya it sangka Grade 10 student sa Brgy. Muging, Banga nga ginasugid nga nag-suicide matapos nga owa ginbak-ean it cellphone nga pagagamiton sa online learning makaron nga may COVID-19 pandemic.
Kadungan kara, ginklaru ni Dr. Miguel Mac Aposin, Schools Division Superintendent it DepEd-Aklan nga may anda eon nga preliminary information angot sa insidente, apang nagapadayun ro andang pag-beripika sa nasambit nga report.
Gindugang pa kara nga bukon eamang it pinaagi sa online ro pagtuon it mga estudyante makaron bangud nga may iba pang mode of learning.
Sa tunga suno kana it ginapangatubang nga pandemya hay bukon nanda it intensyon nga magtuga pa it dugang nga stress bangud nga bukon eamaang it mga learners ro naga-adjust kundi maskin ro mga manugturo ag mga ginikanan man.
Indi sigon kinahangean nga maggastos para sa new normal eabi eon ro pagbakae it mga gadgets bangud nga may ginpahaum man sanda nga mga printed modules, educational tv program, ag radio-based instruction.
Gin-estudyuhan sigon it DepEd ro nasambit nga mga tikang agud nga mapadayun eang ro pag-eskwela it mga learners maskin nga may pandemya.
Ginlaygay pa nana sa mga learners nga indi ma-depress ag ma-stress kon indi masabtan it kompleto ro andang mga modules.
