KALIBO, Aklan—Nagapatigayon it dry run ro Department of Education (DepEd) Aklan kaangot sa bag-o nga pagtinueon-an sa tunga it ginapangatubang nga pandemya tuga it Covid-19.
Suno kay Schools Division Superintendent Dr. Miguel Mac Aposin it DepEd Aklan, ginaistudyuhan sigon nanda sa dry run kon anu ro mga nagakaigong mode of learning nga igadeliver sa sangka lugar nga maging paborable sa mga estudyante, ginikanan ag maskin sa mga manugturo.
Ro tanan sigon hay ginahimo nanda para man sa kaeowasan it mga estudyante eabi eon ag ginadumilian pa ro mga face to face classes kon uwa it bakuna nga madiskubrehan para sa Covid-19.
Maskin nga ginpaboran sigon ni Pangueong Rodrigo Duterte ro ginaduso it DepEd nga makaangkon it limited face to face learning sa mga low risk areas hay sigidas gihapon ro andang pagpahaom sa mga posibleng pamaagi it pagtinueon-an.
Sa nasambit nga dry run suno kay Dr. Aposin hay makaangkon it assessment bangud sa pagahimuon nga mga adjustment sa bag-o nga pagtinueon-an.
Kaangot kara, ginahinyo sigon nanda ro kooperasyon it kada isaea partikular it ginikanan, estudyante ag barangay council para sa ika-successful it school year 2020-2021 nga nakataeana eon nga magbukas ro klase sa Agosto 24.
Sa makaron suno kay Dr. Aposin hay nagaabot eon sa 98 porsyento ro turn-out it enrollment ag eauman ro mabahoe nga adjustment sa makaron nga school year.
