Nagaabot sa masobra 19,000 ro nagpasakop sa early registration it Department of Education sa probinsya it Aklan para sa school year 2026-2027.
Suno kay Dr. Darren Naelgas, Education Program Supervisor Alternate Division Information Officer it DepEd Aklan, nakit-an sa datos nga nagtaas it kapin sa 105% ro mga enrollees kon ikumpara sa early registration nga ginpatigayon para sa school year 2025-2026 kon sa siin nagatapos eon ro klase makaron nga buean it Marso.
Raya hay matapos nga nakalista ro taeatapan it kabilugan nga 19,636 enrolles maghalin sa kinder, grade 1, grade 7 ag grade 12 nga mas mataas kumpara sa 15,082 nga enrollees halin sa kinder hasta it grade 12 sa school year 2005-2006.
Ginpahayag dugang ni Dr. Naelgas nga nagapakita ro nasambit nga datos nga nagapabilin nga maabong estudyante ro nagasueod gihapon sa mga eskwelahan maghalin sa nasambit nga grade lebel.
Nasayuran nga tuyo it early registration nga malikawan ro pagdueotdutan sa eskwelahan sa oras nga magbukas ro school year, mabuligan ro mga eskwelahan sa mas maayos nga pagpahaom it mga kwarta, ag iba pang learning resources antes pa man mag-umpisa ro klase.
Ro early registration hay libre ag uwa it dapat nga ginbayaran ro mga ginikanan kundi nag-fill out eamang ro mga raya it Basic Education Pre-registration Form ag nagsumite it birth certificate it learners.
