KALIBO, Aklan—Owa it reklamo nga nabaton ro Department of Education ukon DepEd-Aklan matapos ro sang domingo nga pagbukas it klase sa bilog nga probinsiya pinaagi sa distance learning nga sa ikaywang dag-on eon makaron.
Raya ro ginpahayag ni Dr. Miguel Mac Aposin, Schools Division Superintendent it DepEd-Aklan.
Suno kana nga base sa andang monitoring hay owa sanda it nasayuran nga anuman nga problema nga ginpaabot partikular sa pagpanupod it modules ag maskin sa mga manugturo nga nagbalik eskwela man sa pihak nga owa pa it face-to-face classes.
Nagapati si Dr. Aposin nga bangud sa tempranong pagpahaum ag maayos nga pag-umpisa it klase rason nga owa sanda it nabaton nga major problems sa pagbalik it eskwela.
Sa pihak nga mataas ro percentage, apang ginpahayag ni Dr. Aposin nga owa pa nanda naabot ro 100% nga target sa enrollment umpisa nga buksan ro klase.
Bangud sa extension it enrollment period hasta sa Setyembre 30, uman nga gin engganyo ni Dr. Aposin ro mga ginikanan nga ipa-register eon ro andang mga inunga.
Eakip suno kana ro mga estudyante nga planong isaylo it ibang eskwelahan.
Samtang, hugut man suno kana nga ginapahauman it DepEd-Aklan ro mga sueundanan nga gintaeana it national office agud nga makapasar sa pagpatigayon it face to face classes.
Sambilog eon sigon kara ro pag engganyo sa mga manugturo nga magpabakuna kontra COVID-19.
Kaibahan man sa ginapahauman it DepEd makaron hay ro pagserbisyo it mga manugturo sa maabot nga eleksyon sa Mayo 2022.
