KALIBO, Aklan—Padayun ro ginahimo nga distribusyon ag retrieval it mga modules it Department of Education ukon DepEd-Aklan para sa mga estudyante.//Raya hay kasunod it ginapatuman nga bag-ong mode it edukasyon sa bilog nga Pilipinas.
Ginkalipay ni Dr. Miguel Mac Aposin, Schools Division Superintendent it DepEd-Aklan nga naeampuwasan it probinsya ro pagpatuman it blended ukon distance learning.
Makaron hay una eon sa 3rd quarter it school year ro mga estudyante.
Raya hay sa tunga it pagpanikasog it gobyerno eabi eon it education sector nga mapadayun ro pagtuon it mga inunga sa tyempo it pandemya daea it COVID-19.
Gindugang pa ni Dr. Aposin nga sigidas ro pagmonitor it mga manugturo sa status it andang mga estudyante pinaagi sa mga ginpasang modules.
Aminado man imaw nga nagapalisod eon ro lesson it mga learners ag sambilog sigon raya sa hangkat sa mga manugturo.
Ginatinguhaan sigon makaron it mga manugturo nga i-adjust ro mga aktibidad ag exercises sa module base sa kapasidad it mga estudyante para indi ro mga raya masyadong malisdan sa pagsabat.
Sa pihak kara, nagapadayun man ro preparasyon it DepEd-Aklan para sa implementasyon it limited face to face classes para maging haum ro probinsya sa oras nga mapasugtan eon raya it pangueo ag National Inter-Agency Task Force.
