KALIBO, Aklan—Preparado eun ro Aklan sa nagahilapit nga Western Visayas Regional Athletic Association (WVRAA) Meet nga igapatigayon sa Pebrero 15 hasta it 22, 2020 kon sa siin maging host ro probinsya.
Suno kay Rebecca Ibarreta, athletic manager it Department of Education (DepEd)-Aklan, ko buean it Setyembre hay nagpatigayon it sports council meeting ro pilang ka mga opisyalis it taeatapan para sa nasambit nga aktibidad.
Raya hay kasunod it nagtapos nga Aklan Provincial Athletic Meet.
Sa kabilugan it Elementary level, naging 2nd runner-up ro Unit 1 nga ginakaeakipan it banwa it Altavas, Batan ag New Washington.
1st runner-up ro Unit 4 nga ginapasakupan it Buruanga, Malay, Nabas ag Tangalan.
Samtang, ro Unit 5 ukon Kalibo district 1 ag 2 ro naging overall champion.
Pag-abot sa Secondary level, ro Unit 4 ro nakakuhit it pwesto bilang second runner-up ag ro Unit 3 maghalin sa banwa it Lezo, Makato, Malinao ag Numancia ro naging first runner-up.
Samtang, back to back champion ro Unit 5 matapos nga ginkilaea it uman bilang overall champion sa Secondary level.
Nasayuran nga ginatos ro mga atleta nga magapasakop sa paaeabuton nga WVRAA Meet 2020 maghalin sa Negros Occidental, Iloilo, Antique, Guimaras, ag Capiz.
