KALIBO, Aklan—Puno it pagpasaeamat ro Department of Education ukon DepEd-Aklan sa madinaeag-on nga pagpatigayon it pilot testing it face-to-face classes sa Laserna Integrated School sa banwa it Nabas Lunes nga adlaw, Nobyembre 15.
Suno kay Dr. Miguel Mac Aposin, Schools Division Superintent it DepEd-Aklan nga gindayaw it assistant secretary ag regional director it DepEd ro naging preparasyon it nasambit nga eskwelahan, kun sa siin nasunod kara it tama ro mga requirements agud nga malikawan ro pagtaeapnan it Covid 19.
Ginkalipay man ni Dr. Aposin ro ginpakita nga bilog nga suporta it lokal nga gobyerno it Nabas, barangay council it Laserna, mga ginikanan ag bilog nga komunidad.
Sa pangkabilugan suno kana hay naging maayos ro pag-umpisa it nasambit nga pilot implementation it limited face-to-face classes.
Owa sigon it naging aberya sa eskwelahan kamana man ro pagbalik it in-person learning.
Natigayon man nga mapatuman it husto ro health protocols.
Ro tanan nga mga nagasueod sa eskwelahan hay kinahangean nga mag agi sa washing area, temperature checking, ag triage area agud nga masiguro ro kaeowasan it tanan.
Sa pihak nga parte, gindugang pa ni Dr. Aposin nga naging emosyunal ro kaeabanan nga mga manugturo ag mga opisyal it DepEd sa pagbalik eskkwela it mga estudyante matapos ro masobra sa sang dag-on nga owa pagpatiagyon it klase bangud sa makamaeatay nga sakit.
