KALIBO, Aklan—Target it Department of Education ukon DepEd-Aklan nga 100% eon nga mabuksan ro tanan nga mga eskwelahan sa probinsiya sa pagbukas kara it klase sa Agosto.
Raya ro ginpahayag it bag-ong pungko nga Schools Division Superintendent nga si Dr. Feliciano Buenafe, Jr.
Angot kara, ginkalipay nana ro madinaeag-eon nga pagpatigayon it limited face to face classes sa kapin sa 200 eon nga mga eskwelahan sa Aklan.
Suno kay Dr. Buenafe nga pagatinguhaan nanda nga mas maabu pa nga mga eskwelahan ro makapatigayon it limitadong in-person classes sa tunga it pandemya.
Ginklaru nana nga blended learning sa gihapon ro andang igapatuman kun sa siin may tiempo nga makapatigayon it klase sa eskwelahan ag ro pagsabat it andang work activity sheets ag module sa baeay.
Sa Hunyo 24 hay nakataeana nga magatapos ro presenteng school year 2021-2022 ag paga-umpisahan ro school year 2022-2023 sa Agosto 22 nga magatapos sa Hulyo 7, 2023.
